11/08/2017

Alcordances de 2016 (II): el premiu Picu Peñamellera

A estes hores, fai un añu, diba camín de Panes a recibir y agradecer el premiu Picu Peñamellera na so edición númberu ventidós. Dos años primero metiérenme ente los candidatos a una medaya que, por edá y traxectoria, nun me paez qu'ameritare. Asina que, arguyosu y un puntu estrañáu, púnxime nel Valle Baxu depués d'unos díes de clas na UABRA, na otra punta'l país.

Santos Fidel, Carlos y Alberto coles medayes

La ceremonia peñamellerana, formal y emotiva, da-y un aire d'importancia que, ¡qué coime!, estrema a esti gallardón de cualquier otru. Prestóme conocer a Santos Fidel Ruiz y volver a falar con Alberto Fernández depués d'un tiempín ensin velu. D'ente'l públicu, tamién pudi falar con clásicos y referentes como Isidro Caballero, Mauro Blanco, Julio Braun, José Ángel Hoyos o'l mio amigu Pacu Pricu (Francisco Álvarez), que m'acompañó dende Cangas del Narcea. De Cecilio Testón, que yera la segunda vez que lu vía, ablucóme'l so ciñu colos premiaos, la so escucha atenta a tolo que se dixo. Qu'en paz tea.

Ellí, na ceremonia, pudi echar un discursín cariñosu y críticu, con propuestes. Recibí dalguna felicitación y noté que la xente con cargu públicu tamién escuchaba les mios palabres. Dexo equí la mio intervención.


Caleyemos Panes y volviemos pa casa cola medaya y un númberu más de la revista Bolera, otru milagru más de l'Asociación Bolística Pico Peñamellera. Una tarde bien prestosa, como va ser la de güei pa los premiaos d'esti añu, como lleven siendo les d'estos ventidós.

¡Gracies!

13/02/2017

Alcordances de 2016 (I): xuegu tradicional en La Buena Tarde

Con esta alcordanza entamo un añariu de lo más memorable ente lo vivío en tarrén ludomotor en 2016.

Güei ye'l Día Mundial de la Radio y, anque nun soi mui de "díes de", esta mañana nun pudi dexar d'alcordame de la última vegada que na radio tuvi. Foi'l 24 d'agostu, en viéspores de viaxar pa Santander, al conceyu añal de l'AEJST. La Buena Tarde, el programa de Monchi na RPA, convidábame a falar de xuegu y deporte tradicional xunto a otru Carlos, Carlos F. Caicoya. Nun lu conocía personalmente y aquel día caletrié la fondura de la so conversación y la so gran sensibilidá cultural.
Carlos Caicoya, al traviés del oxetivu de La Nueva España.

La vida ye tremenda: aquel alcuentru que tanto nos prestó a dambos, nun va tener segundes enxamás. Carlos morrió a primeros d'ochobre. Un abrazu a la so xente y a tol equipu de La Buena Tarde.

Aquel alderique, equí, in memoriam.

18/05/2016

Colla juganera / Cla xugadora

Qu'esti testín diba escribise, súpilo de xuru nel mesmu momentu que garraba'l Vic-Barcelona na tardiada del 10 de xunetu de 2015. Naquel trenucu camín del aeropuertu ponía acabación a cinco díes de plenitú na IV (pa min, la primera) Escola de Jocs Tradicionals de la Cía. de Jocs l'Anònima. En Folgueroles y na mesma ciudá de Vic, desenvolvióse una esperiencia pedagóxica y vital de les que nun atesoro munches.

Exa temática del cursu

Amalando, con ferviella y cásique afogáu pola fola de calor, aporté a Barcelona na viéspora del cursu, el domingu 5 al atapecerín. Malpenes fui quien a dormir ente uno y otro y cuando quixi dame cuenta, taba en coche del collaciu Víctor, con otres tres compañeres de cursu, como nun Tetris de xente y bolses de viax, camín de Vic. 

La primer sesión, pela mañana, foi una repasada a les dinámiques de conocencia, interesante, prestosa. Y mira que ye complicao polo masuñao del asuntu. Pela tarde, Biel empobinónos al traviés de la so propuesta d'aplicación de les Auques na escuela (equí, un exemplu). Darréu, lleguémonos a la Universitat de Vic (esposición) y al Consell Comarcal d'Osona (conferencia d'Amadeu Carbó) pa siguir estudiando a Amades, home trescendental pa la cultura tradicional catalana que recoyó, nuna de les sos obres, l'Auca de Jocs de la Mainada, exa temática d'esta IV Escola de Jocs. De nueche, jocs a la fresca no vieyo de Vic, una oportunidá pa tar cola xente de la ciudá.

Revolucionando'l xuegu

El martes, entamemos afondando nel Auca. Estudiu teóricu y muncho xugar ensin dexar d'analizar el patrimoniu que tábemos esfrutando y les sos posibilidaes. En xintando, Òscar punxo enriba la mesa'l so apueste polos xuegos de distancia curtia. Un ámbitu, pal que tengo sío prexuiciosu, que me prestó re-conocer y re-enfocar, que m'inspira pa siguir trabayando les situaciones de micromotricidá, esi xuegu motor nel que nun se suda. Darréu, volvióse a los xuegos del Auca y, yá de nueche, a les cais de Vic.

Trabayando na fechura de xuegos

El miércoles foi la xornada de Folgueroles. Cinto Torrents (antropólogu y paisanu) punxo la burra pa la carrera de cintes d'a caballu, punxo la xente del pueblu pa los xuegos de cai y la butifarrada y punxo'l so conocimientu fondu y cenciellu na mano de tol mundu. Fiximos xuegos d'ermita, caminemos y cantemos, garremos cañes y blimes y, ensiguidina, col goxeru Joan Farré, construyimos xuguetes pa enredar nes fontes. Lleímos a Verdaguer y depués visitemos la so casa, au taben actuando Els Tranquils. P'acabu hebo coques duces con embutíu y vinu de la tierra. Acabé'l día emocionáu al veme dafechu integráu naquel esfrutar de la so, la nuesa, cultura: la del pueblu catalán. 

Deprendiendo col goxeru

El xueves pela mañana, la Escola fíxose toa fábrica d'inxenios lúdicos. Propuestes de xuegu y enriedu que nos dexaron empatar col homo faber que tenemos dientro. Depués, Miqui púnxonos en danza col mundu del xuegu musical, el baille-xuegu, la motricidá que se canta. Lo que nun sabíemos yera que namás tábemos caleciendo pa lo muncho que diba trayer el conciertu del mesmu Miqui nel centru la ciudá. Pente medies, pudi esponer lo que yera un pasabolu asturianu, daqué mui esótico ellí.

Pasabolu asturianu a 40ºC

El vienres tocó comprobar que siguimos siendo quien a tornar el ferruñu del mal maestru. La reciella de les colonies urbanes de branu quería xugar y, ¡claro!, ehí taba la otra reciella, o sía: nós. Diseñemos una montonera d'estaciones, axustemos xuegos y... ¡xuguemos! Y non, el ferruñu pedagóxico tovía nun nos apoderare. De tarde, repasín de bones práctiques, despidida y pal tren Vic-Barcelona.

Xuguemos a tiempu y a destiempu y ente xinta y primer clas de la tarde, tamién xuguemos. Pero sobre too, falemos y escuchemos. Asina, ensin espaciu baleru, como nel coche de Víctor au entamé a alitar de la ferviella. Agora que ta abierta la inscripción pa la V Escola de Jocs, otra vegada en Vic (au -como dixi tando ellí- Catalunya fa olor a futur), convídovos a conocer la Cía. de Jocs l'Anònima, la so filosofía, la so pedagoxía y la so lleal cla xugadora, educadores que nun dulden n'alcontrase tolos branos con estos cuatro llocos de los xuegos, del so país, de la vida. Y nun me choca.

Una abraçada: Ángeles, Silvinha, Roser, Rosa, Iolanda, Encarna, Marc, Montse, Judit, Susanna, Anna, Lídia, Cinto, Miqui, Òscar, Víctor, Biel, treballadors de l'Alberg Canonge Collell, UVIC, gent de Vic i Folgueroles.

Visca la colla juganera! ¡Puxa la cla xugadora!

Les semeyes son de Biel Pubill y de la Cía. de Jocs l'Anònima.

29/04/2016

Nun queisa

Como escribí va poco pa La Llegra, Nun queisa ye un documentariu que fala de la recuperación del xuegu de bolos na montaña suroccidental asturiana, que percuerre les implicaciones emocionales, sociales y económiques d'esi resurdimientu de calter deportivu.
 
Títulu del documentariu.

Ye una hestoria, a medies narrada y a medies cuntada en primer persona del plural, que fala de cómo un grupu humanu punxo en valir parte del so patrimoniu, d'alcuerdu a una actitú de resistencia contra'l desaniciu de los pueblos y l'escaezu de la cultura tradicional.

La bolera de Gillón / Xichón sol picu Caniel.las, que-y da nome.

Esta tarde, Pacu'i Pricu (Francisco Álvarez Cadenas, que ye'l presidente de l'Asociación del Bolu Vaqueiru y co-protagonista) y yo vamos presentar Nun queisa pa, en viéndolu, abrir alderique alredor del documentariu, del xuegu que retrata, de los bolos en xeneral o de cualquier otru asuntu nel ámbitu de los xuegos y los deportes tradicionales.

L'equipu que fixo'l trabayu, el de La Bolera (TPA) sacante Milio'l del Nido, resolvió en cosa de díes una propuesta de l'Asociación del Bolu Vaqueiru, encontada namás nuna axudina económica del conceyu de Cangas del Narcea, aprovechando qu'en 2014 (añu cuando se grabó'l documentariu) dedicábase la Selmana Cultural canguesa a los bolos. N'aquella mesma Selmana llegó a prestrenase'l documentariu pero nun foi hasta un tiempín más tarde que se remató y otru tiempín más que quedó depositáu llegalmente (2016).
De grabación pa Nun queisa: Antón García, Carlos Suari y Lucía Menéndez.

Ello fixo que'l trabayu se desenvolviere en probitú de medios, pero non en probitú d'esfuerzu nel nuesu equipu y na xente del bolu vaqueiru. El resultáu paezme que cumple con ser una güeyada xeneral al pasáu y al presente del xuegu y con trabayar, seique per primer vegada, lo sociocultural ensin escaecer lo emocional. 

Convídovos, con llicencia del Espaciu La Llegra, a que nos véamos ellí a les 20 hores d'esti 29 d'abril.

28/07/2015

La cuatriada según Ruma Barbero

http://moyandolculu.com

Moyando'l culu ye la serie braniega de cómic del dibuxante y músicu Ruma Barbero. Vera, una neña madrilana con familia d'equí, ta en Xixón echando les vacaciones. Los sos amiguinos son l'axente "re-enculturizador", los que la envereden pel "asturian way of life". Esta vegada ye la cuatriada lo que-y tuerz el mexu a la probe Vera. Nun ye pa menos: ¡la cuatriada, pa quien lo entienda!

Gracies, Ruma, por alcordarte del xuegu tradicional en Moyando'l culu. Prestó.

27/07/2015

Na Fiesta'l Pastor

La Fiesta'l Pastor ye un finxu pa la tradición xugada d'Asturies. El tiru cuerda y la xubida a la Porra d'Enol son (pa min) les dos pieces principales d'esta romería-raspiacielos del mes de xunetu, ensin quita-y méritu a la carrera d'a caballu. Va dos años grabemos un programa de La Bolera nesta fiesta. Ta pa velu calcando equí.

Semeya: El Fielato y El Nora.
De la crónica de la Fiesta d'esti añu paguen muncho la pena les semeyes que fixo y asoleyó El Fielato. Nelles pescúdense fácil la fuercia y la verdá de lo que se xuega ellí tolos branos.

24/07/2015

Xugar a ciclistes (I)

Siempre que toi atendiendo pa una competición ciclista y, más tovía, cuando algamo'l bon vezu d'andar en bici un poco de siguío, viénenme les memories de cuando xugábemos a ciclistes de criúcos. Estremo tres formes de xugar a ciclistes, de la de más neñu a la de más mozu. Yeren los años 90 en La Xungarosa, Avilés (El Barrio de la Luz). La primera d'eses formes de xugar a ciclistes yera una corrida de chaples. Garrábemosles n'El México, El Alfil y n'otros chigres de la contorna. En metiéndoles en bolsu, díbemos pal container qu'había cerca l'empate de les cais Hernán Cortés y Francisco Pizarro, xusto au principiaba'l pobláu xitanu que s'allargaba ta Villalegre. Ellí, nun entemez de puxarra y porquería, atopábemos otres dos coses mui preciaes pa esti xuegu: del vidru y del xiz.

El vidru francíemoslo sapiándolo contra'l suelu ta facelo cachinos qu'arrascábemos contra dalguna peña pa ponelos romos y redondos, xusto a la midida de les chaples. El xiz, de planches de yelsu que tamién francíemos, valíanos pa pintar peles ceres el camín a percorrer. Nesti puntu, yá teníemos tres coses básiques pa facer una chapla ciclista, pero faltábanos una. D'un periódicu o de la revista Ciclismo a fondo, sacábemos les cares de los nuesos ciclistes favoritos. Pa los periódicos nun había problema: los mesmos chigres que nos daben chaples, dábennos númberos vieyos de La Voz de Avilés, La Nueva España, Marca... Pero, ¡ai amigu!, si queríemos semeya a color, lo más a mano yera retayala a escondidielles na biblioteca'l barriu, que yera au taba la Ciclismo a fondo del mes. En resultes: chapla + semeya + redondelín de vidru = ciclista fechu. Tamién ye verdá que-y metíemos un migayu plastilina (o un chicle) pa da-y más pesu y pa rematar meyor la xunta del vidru y la chapla, pa que nun s'esmangare si volquiaba.

Dicía enriba que colos cachinos de xiz pintábemos el percorríu, ¡qué percorríu! Altos de toles categoríes, revueltes a esgaya y un mecigayu de metes volantes, intergiros y esprinos especiales qu'espeyaba la nuesa pasión ciclista internacionalizada. Dacuando la etapa diba toa per un bordiellu, que daba más vértigu pero quitaba la polémica de les rayes. Otres vegaes, les más, el camín diba pela cera, con tola polémica de les rayes amburiando: ¡Fulanín ta fuera! ¡Mentira, toi picando! Pa los altos, aprovechábemos les cuestes de les ceres y según lo llargues o pindies, poníemos-yos les categoríes. Anque nun nos prestaben gran cosa, facíemos tamién etapes planes. Pa prestar, les contrarrelós, ¡qué nervios les contrarrelós! 

¿Y cómo xugábemos? ¡A cutes! Pa les etapes en llinia (les que nun son contrarrelós), desque'l primeru pasaba pela meta cuntábemos cuantos cutes de diferencia sacaba a los demás. Pero poníemos un tope d'espera pa nun lo facer mui llargo, que mialma los había bien chepos. Pémeque de normal el tope anti-chepos yera a 5 cutes, una midida intelixente pal bienvivir del propiu xuegu. El que ganaba la etapa tenía 0 cutes y los demás quedaben penalizaos colos cutes de más que fixeren.

Sicasí, nes contrarrelós cuntábense tolos cutes que gastaba cadún pa facer el percorríu y comparábense los resultaos. Al meyor poníemos-y 0 cutes y los demás quedaben colos cutes de más, igual que nes etapes en llinia. Too esto sumábase nuna xeneral, porque de normal igual echábemos 5 o 6 etapes. El premiu la montaña y les metes volantes (esprinos o intergiros) yeren por puntuación. Los altos puntiaben según la so categoría y les metes volantes yeren toes iguales. Si nun toi mal, dábemos puntos namás a los tres primeros que pasaben per cada cosa.

Teníemos una llibretina na que s'apuntaben tolos datos de les etapes y les sumes de cutes y puntos de cada clasificación. Alcuérdome cómo nos arredolábemos viendo los númberos d'aquelles fueyes y cómo facíemos llectures al altu la lleva del resultáu, al xeitu d'un speaker. Ah, sí... ¡y tamién dibuxábemos los perfiles de les etapes naquella llibretina!

Xente habíalo mui fino pa cutir la chapla, pero habíalo igual de fino pa dibuxar los percorríos en suelu, p'apuntar na llibreta, pa facer de speaker y pa iguar les chaples (sí, y pa mangar los retayos a color na revista de la biblioteca). Naide nun yera curiosu pa toles facetes y toos teníemos una o dos facetes nes que rescamplar, asina qu'a tol mundu-y prestaba pola vida.

Pémeque siendo más pequeñinos xugáremos a la versión más tradicional del xuegu, una corrida cenciella de chaplones, pero'l ciclismu garrónos la neñez pela metada y el productu del amiestu foi más o menos esti xuegu qu'escribí equí. Datu: nun ta de más esclariar qu'Induráin nun trunfaba na nuesa plazoleta, vese que yéremos toos romingeristes y del CLAS.