Xugar a ciclistes (I)

Siempre que toi atendiendo pa una competición ciclista y, más tovía, cuando algamo'l bon vezu d'andar en bici un poco de siguío, viénenme les memories de cuando xugábemos a ciclistes de criúcos. Estremo tres formes de xugar a ciclistes, de la de más neñu a la de más mozu. Yeren los años 90 en La Xungarosa, Avilés (El Barrio de la Luz). La primera d'eses formes de xugar a ciclistes yera una corrida de chaples. Garrábemosles n'El México, El Alfil y n'otros chigres de la contorna. En metiéndoles en bolsu, díbemos pal container qu'había cerca l'empate de les cais Hernán Cortés y Francisco Pizarro, xusto au principiaba'l pobláu xitanu que s'allargaba ta Villalegre. Ellí, nun entemez de puxarra y porquería, atopábemos otres dos coses mui preciaes pa esti xuegu: del vidru y del xiz.

El vidru francíemoslo sapiándolo contra'l suelu ta facelo cachinos qu'arrascábemos contra dalguna peña pa ponelos romos y redondos, xusto a la midida de les chaples. El xiz, de planches de yelsu que tamién francíemos, valíanos pa pintar peles ceres el camín a percorrer. Nesti puntu, yá teníemos tres coses básiques pa facer una chapla ciclista, pero faltábanos una. D'un periódicu o de la revista Ciclismo a fondo, sacábemos les cares de los nuesos ciclistes favoritos. Pa los periódicos nun había problema: los mesmos chigres que nos daben chaples, dábennos númberos vieyos de La Voz de Avilés, La Nueva España, Marca... Pero, ¡ai amigu!, si queríemos semeya a color, lo más a mano yera retayala a escondidielles na biblioteca'l barriu, que yera au taba la Ciclismo a fondo del mes. En resultes: chapla + semeya + redondelín de vidru = ciclista fechu. Tamién ye verdá que-y metíemos un migayu plastilina (o un chicle) pa da-y más pesu y pa rematar meyor la xunta del vidru y la chapla, pa que nun s'esmangare si volquiaba.

Dicía enriba que colos cachinos de xiz pintábemos el percorríu, ¡qué percorríu! Altos de toles categoríes, revueltes a esgaya y un mecigayu de metes volantes, intergiros y esprinos especiales qu'espeyaba la nuesa pasión ciclista internacionalizada. Dacuando la etapa diba toa per un bordiellu, que daba más vértigu pero quitaba la polémica de les rayes. Otres vegaes, les más, el camín diba pela cera, con tola polémica de les rayes amburiando: ¡Fulanín ta fuera! ¡Mentira, toi picando! Pa los altos, aprovechábemos les cuestes de les ceres y según lo llargues o pindies, poníemos-yos les categoríes. Anque nun nos prestaben gran cosa, facíemos tamién etapes planes. Pa prestar, les contrarrelós, ¡qué nervios les contrarrelós! 

¿Y cómo xugábemos? ¡A cutes! Pa les etapes en llinia (les que nun son contrarrelós), desque'l primeru pasaba pela meta cuntábemos cuantos cutes de diferencia sacaba a los demás. Pero poníemos un tope d'espera pa nun lo facer mui llargo, que mialma los había bien chepos. Pémeque de normal el tope anti-chepos yera a 5 cutes, una midida intelixente pal bienvivir del propiu xuegu. El que ganaba la etapa tenía 0 cutes y los demás quedaben penalizaos colos cutes de más que fixeren.

Sicasí, nes contrarrelós cuntábense tolos cutes que gastaba cadún pa facer el percorríu y comparábense los resultaos. Al meyor poníemos-y 0 cutes y los demás quedaben colos cutes de más, igual que nes etapes en llinia. Too esto sumábase nuna xeneral, porque de normal igual echábemos 5 o 6 etapes. El premiu la montaña y les metes volantes (esprinos o intergiros) yeren por puntuación. Los altos puntiaben según la so categoría y les metes volantes yeren toes iguales. Si nun toi mal, dábemos puntos namás a los tres primeros que pasaben per cada cosa.

Teníemos una llibretina na que s'apuntaben tolos datos de les etapes y les sumes de cutes y puntos de cada clasificación. Alcuérdome cómo nos arredolábemos viendo los númberos d'aquelles fueyes y cómo facíemos llectures al altu la lleva del resultáu, al xeitu d'un speaker. Ah, sí... ¡y tamién dibuxábemos los perfiles de les etapes naquella llibretina!

Xente habíalo mui fino pa cutir la chapla, pero habíalo igual de fino pa dibuxar los percorríos en suelu, p'apuntar na llibreta, pa facer de speaker y pa iguar les chaples (sí, y pa mangar los retayos a color na revista de la biblioteca). Naide nun yera curiosu pa toles facetes y toos teníemos una o dos facetes nes que rescamplar, asina qu'a tol mundu-y prestaba pola vida.

Pémeque siendo más pequeñinos xugáremos a la versión más tradicional del xuegu, una corrida cenciella de chaplones, pero'l ciclismu garrónos la neñez pela metada y el productu del amiestu foi más o menos esti xuegu qu'escribí equí. Datu: nun ta de más esclariar qu'Induráin nun trunfaba na nuesa plazoleta, vese que yéremos toos romingeristes y del CLAS.